ثمن البصل فات 16 درهم فالأسواق والشنّاقة دارو ما بغاو

عرفات أثمنة البصل فالأيام الأخيرة ارتفاع واضح فمختلف أسواق المغرب، حتى وصل ثمن الكيلو الواحد لحوالي 16 درهم، وسط تبادل المسؤوليات بين المهنيين ديال إنتاج وتسويق الخضر والفواكه.

ووصل ثمن الكيلو ديال البصل، صباح اليوم السبت، لحوالي 11 درهم فسوق الجملة ديال الخضر والفواكه فـإنزكان، مع ترقب شنو غادي يوقع فالأثمنة مع اقتراب عيد الفطر.

وكيقولو المهنيين باللي الطلب الكبير على البصل فشهر رمضان ساهم بشكل مباشر فارتفاع الثمن ديالو، سواء فسوق الجملة أو حتى فالتقسيط، وهاد الشي جا حتى مع استمرار تدبير الكميات اللي كانت مخزنة من الصيف اللي فات.

عدد ديال المهنيين اتهموا الشناقة أنهم السبب الرئيسي ديال الارتفاع الصاروخي فأثمنة البصلة وقالوا أن الثمن ديالها فالجملة لا يتجاوز 8 دراهم ولكن الجشع ديال المضاربين هو لي خلاها تولي بـ16 درهم.