تشافي هيرنانديز كا يأكد أن الجامعة تواصلات معه باش يدرب المنتخب المغربي
قال المدرب الإسباني تشافي هيرنانديز باللي توصل فعلاً بعرض من المغرب باش يدرب المنتخب الوطني ويكون هو الخليفة ديال وليد الركراكي، قبل ما تقرر الجامعة الملكية المغربية لكرة القدم فالأخير تعيين محمد وهبي باش يقود “أسود الأطلس”.
وقال تشافي فتصريحات لصحيفة “لا فانغوارديا”، نقلاتها وسائل إعلام محلية وإسبانية: “توصلت بعدة عروض، واحد منهم كان من المغرب، وكاينين عروض آخرين من دول أخرى”.
وعبر المدرب السابق لنادي برشلونة على الاهتمام ديالو بتجربة تدريب المنتخبات الوطنية، ووضح: “صحيح أن التدريب فالأندية كيكون صعيب باش توفق بين الخدمة والحياة العائلية، وهاد الشي علاش باغي حتى نجرب راسي مع منتخب”.
وزاد تشافي هيرنانديز قال: “كنطمح نشارك فكأس العالم ولا بطولة أوروبا، وعلاش لا حتى فكأس أمم إفريقيا”.
وكانت الجامعة الملكية المغربية لكرة القدم علنات نهار الخميس اللي فات التعاقد مع محمد وهبي باش يقود المنتخب الوطني، وبهذا سالات فترة الترقب اللي كانت حول شكون غادي يكون المدرب الجديد ديال “أسود الأطلس”.
