محمد وهبي المدرب الجديد ديال المنتخب المغربي

أعلن رئيس الجامعة الملكية المغربية لكرة القدم، فوزي لقجع، مساء اليوم الخميس فمدينة سلا، تعيين الإطار التقني الوطني محمد وهبي كمدرب جديد للمنتخب المغربي بلاصة وليد الركراكي.

وخلال ندوة صحفية تنظمات فقاعة الندوات ديال مركب محمد السادس لكرة القدم فالمعمورة بسلا، عبّر لقجع على التمنيات ديالو بالتوفيق والنجاح لمحمد وهبي فالمهمة الجديدة ديالو.

وجا هاد التعيين من بعد ما قدر وهبي يحقق إنجاز كبير رفقة المنتخب المغربي لأقل من 20 سنة، حيث توّج بكأس العالم لأول مرة فالتاريخ ديال هاد الفئة.

ودابا غادي يشد تدريب المنتخب الأول ديال أسود الأطلس قبل شهور قليلة من انطلاق نهائيات كأس العالم 2026.

وغادي يبدا محمد وهبي المشوار ديالو مع المنتخب الوطني الأول بجوج مقابلات وديّتين: الأولى ضد الإكوادور فإسبانيا نهار 27 مارس، والثانية ضد الباراغواي نهار 31 مارس.

وكانت قرعة مونديال 2026 حطات المنتخب المغربي فالمجموعة الثالثة، إلى جانب منتخبات البرازيل، واسكتلندا، وهايتي.