مريم الزوبير مشات للقضاء بعدما تعرضات للتشهير

علنت المؤثرة المغربية مريم الزوبير أنها لجأت للقضاء، بسبب حملات التشهير اللي كتتعرض ليها فمواقع التواصل الاجتماعي.

وكشفت الزوبير، من خلال فيديو هبطاتو فالحساب ديالها على إنستغرام، بأنها دارت شكاية رسمية لدى المحكمة الابتدائية الزجرية بعين السبع، على قبل السبّ والشتم اللي كيمسّ بالسمعة ديالها.

المؤثرة فضّلات تخلي الأمور فـيد القضاء، وما بغاتش تكشف على هوية الشخص ولا الأشخاص اللي دارت ضدهم الشكاية.

وفهاد السياق، عبّرت مريم الزوبير على الثقة الكاملة ديالها فالقضاء المغربي، وكتأكد أنها كتسنى القانون ياخذ مجراه وترجع ليها حقوقها.