الكاف كا تعلن المغرب رسميا بطلاً لكاس إفريقيا 2025
علنات لجنة الاستئناف ديال الاتحاد الإفريقي لكرة القدم (CAF) مفاجأة كبيرة بخصوص ماتش المغرب و السنغال فالفينال ديال “الكان”، ملي علنات على قبول الاستئناف ديال الجامعة الملكية المغربية لكرة القدم شكلاً وموضوعاً.
وبناءً على المادتين 82 و84 من قوانين كأس إفريقيا، تقرر يتحسب المنتخب السنغالي خاسر بالانسحاب فالفينال ديال “توتال إنرجيز” المغرب 2025، ويتحسب الربح للمنتخب المغربي بنتيجة 3 لزيرو.
ووضحات اللجنة فبلاغ خرجاتُو نهار الثلاثاء، باللي القرار ديال اللجنة التأديبية السابقة تلغى، وأكدات باللي الاتحاد السنغالي خالف المادة 82 بسبب السلوك ديال الفريق ديالو فالماتش.
وزادت قالت باللي الشكاية ديال المغرب كانت مبنية قانونياً، وهاد الشي خلاهم يطبقو عقوبة الانسحاب اللي جاية فالمادة 84، ويرفضو جميع الدفوعات ديال السنغال.
وفيما يخص الملفات الفردية، تقبل الطعن ديال اللاعب إسماعيل الصيباري بشكل جزئي.
ورغم أن الصيباري تأكد دار مخالفة للمادتين 82 و83 من القانون التأديبي، تبدلات العقوبة ديالو وولات غير توقيف جوج ماتشات رسميين (واحد فيهم موقوف التنفيذ)، وتلغات الغرامة الكبيرة اللي كانت مفروضة عليه واللي كانت 100 ألف دولار.
القرار حتى هو راجع بعض الغرامات اللي كانت مفروضة على المنظمين، بحيث نقصات غرامة ديال “جامعي الكرات” حتى ولات 50 ألف دولار، ونقصات غرامة “استعمال الليزر” حتى 10 آلاف دولار فقط.
وفالمقابل، تثبتات غرامة 100 ألف دولار بخصوص التدخلات فمحيط تقنية الفار (VAR)، حيث ترفض الاستئناف اللي تقدم عليها.
