الحسين عموتة الأقرب باش يدرب الوداد

حسم رئيس الوداد الرياضي، هشام آيت منا، بشكل شبه نهائي فملف المدرب الجديد ديال الفريق، من بعد ما توصل لاتفاق مع الإطار الوطني الحسين عموتة باش يشد العارضة التقنية للنادي فالمرحلة الجاية.

وحسب مصادر مقربة، تلاقاو الطرفين مساء الأربعاء فوق طابلة الفطور، وفهاد اللقاء تفاهمو على تفاصيل العقد، وباقي غير يكملو الإجراءات الرسمية باش يتعلن الاتفاق بشكل نهائي.

وفنفس السياق، مرتقب آيت منا يجتمع مع المدرب الحالي أمين بنهاشم باش يلقاو صيغة لفسخ العقد بالتراضي بين الطرفين.

و جات هاذ الخطوة من بعد تراجع النتائج ديال الفريق فالفترة الأخيرة، خصوصاً من بعد الهزيمة قدام الجيش الملكي، وزيد عليها الأداء اللي ما كانش مقنع حتى فالماتش اللي ربح فيه الوداد بصعوبة قدام اتحاد تواركة.

وفالمقابل، احتمال رجوع الحسين عموتة قسم جماهير الوداد بين مؤيد كيشوف أن التجربة والخبرة ديالو يقدرو يرجعو التوازن للفريق، ومعارض مازال ما نساوش الطريقة اللي غادر بها قبل، خلال تحضيرات موسم 2022، ملي اختار يلتزم بتحليل مباريات كأس العالم 2022.