الملك محمد السادس غا يدير زيارة رسمية لفرنسا قريبا

كتجري دابا فالكواليس ديال الدبلوماسية بين المغرب وفرنسا ترتيبات لزيارة رسمية غادي يديرها الملك محمد السادس لفرنسا، واللي من المنتظر يتخللها حدث كبير كيهم التوقيع على معاهدة صداقة بين الجوج ديال البلدان.

وحسب الخبر اللي نشراتو جريدة “لوموند” الفرنسية، فمن المتوقع أن الملك محمد السادس يدير زيارة دولة لباريس ما بين الصيف والخريف ديال هاد العام.

وهاد الزيارة، اللي كيتوجد ليها من طرف الرباط وباريس، الهدف منها هو توقيع معاهدة صداقة غير مسبوقة وتعزيز الشراكة الاستراتيجية بين البلدين.

ووفق الإعلام الفرنسي، الحكومتين خدامين دابا بشكل مكثف على إعداد نص هاد المعاهدة.

وكيشرف على هاد المهمة لجنة مشتركة، كيرأسها وزير الخارجية الفرنسي السابق هوبير فيدرين والسفير المغربي السابق ففرنسا شكيب بنموسى.

وكتجي هاد الزيارة من بعد الدعوة الرسمية اللي وجهها الرئيس الفرنسي إيمانويل ماكرون للملك محمد السادس خلال الزيارة ديالو للمغرب فشهر أكتوبر 2024.

وكان فالأول مبرمج أن الزيارة تكون فآخر سنة 2025، ولكن تأجلات، وحتى لدابا ما تعلن حتى تاريخ رسمي لهاد الحدث الدبلوماسي المهم.

وكتدخل هاد الزيارة الملكية فإطار استمرار الشراكة الاستثنائية المعززة اللي توقعات فالرباط، واللي كتهم بزاف ديال المجالات الاستراتيجية بحال الأمن الصحي، وتدبير الموارد المائية، والذكاء الاصطناعي، والانتقال الطاقي.

كما كتشمل حتى التحضير للأحداث الكبرى، وعلى رأسها كأس العالم 2030 اللي غادي ينظم فالمغرب.

كما أن ملف الهجرة عندو حتى هو مكانة مهمة فهاد الشراكة، مع التركيز على تسهيل التنقل القانوني ومحاربة الهجرة غير النظامية.

وزيادة على هاد الشي، كيسعاو المغرب وفرنسا لتنسيق الجهود ديالهم فإفريقيا وفالفضاء الأورو-متوسطي، باش يتعاملو بشكل أحسن مع الأزمات العالمية والتحديات المناخية.