الوزير برادة كا ينفي وجود تلاعبات فقطاع التعليم

نفى وزير التربية الوطنية والتعليم الأولي والرياضة، محمد سعد برادة، وجود شي تلاعب فالصفقات داخل القطاع، خصوصاً المرتبط بـورش مدارس الريادة، واعتبر أن الهدرة على هاد الموضوع “ما عندهاش أساس”.

وأكد الوزير باللي الوزارة قدرت توفر حوالي 400 مليون درهم فالصفقات العمومية مقارنة مع السنوات اللي فاتت، بفضل حسن التدبير.

وجا هاد التوضيح خلال الجلسة العامة ديال الأسئلة الشفهية فمجلس النواب، رداً على تعقيب ديال النائبة ريمة بوجة عن فريق العدالة والتنمية، اللي قالت باللي الوزارة كتشري نفس السلع بأثمنة طالعين بحوالي 30 فالمائة مقارنة مع مؤسسة محمد السادس للأعمال الاجتماعية للتربية والتكوين، واعتبرت هاد الشي “هدر للمال العام” وكيحتاج توضيح.

وفالرد ديالو، شدد برادة على أن التبخيس من خدمة حوالي 350 ألف موظف فالقطاع، من أساتذة ومديرين ومفتشين، والقول باللي التعيينات كاملة سياسية، راه حتى هو “خطأ كبير”.

وفموضوع آخر، كشف الوزير على اتفاقية شراكة بين وزارة التربية الوطنية ووزارة الداخلية، الهدف ديالها هو تزويد وزارة الداخلية بمعطيات دقيقة على الخصاص اللي كاين فالنقل المدرسي.

ووضح باللي لجان مشتركة غتجتمع كل ثلاثة شهور باش تتبع وضعية التلاميذ اللي منقطعين على الدراسة وترجعهم للمدرسة، وزيد عليها تتبع خدمة النقل المدرسي.

وبرز الوزير أن هاد الاتفاقية كتهم حتى تحديد التلاميذ اللي خاصهم يستافدو من النقل المدرسي، موضحاً باللي التلاميذ اللي كيدوزو أكثر من ساعة فالتنقل خاص يتوفرو ليهم الداخليات باش يقدرو يكملو قرايتهم. وكشف باللي 684 ألف تلميذ كيتستافدو دابا من النقل المدرسي، ولكن خاص هاد الخدمة تتحسّن أكثر باش نحدّو من الهدر المدرسي.

وعلى مستوى التعليم فالوسط القروي، أكد برادة باللي هاد المجال كيبقى أولوية، حيث أن أكثر من 55 فالمائة من المؤسسات التعليمية كاينة فالعالم القروي، وكتوصل لـ6800 مؤسسة، منها 5212 ابتدائي، و1053 إعدادي، و621 ثانوي تأهيلي.

وأضاف باللي الوزارة دارت 1461 قاعة دراسية جديدة باش تحارب الاكتظاظ، وخصصات 500 مليون درهم لإصلاح المراحيض وحل مشكل الصرف الصحي، مع الالتزام بربط 600 مؤسسة و3400 فرعية بالماء الصالح للشرب، وإذا ما كانش ممكن، غيتزودو بخزانات ديال الماء باش تبقى المرافق الصحية خدامة فالمؤسسات التعليمية القروية.