السلطات الأمنية وقفات 118 شخص كا يبيعو تذاكر “الكان” فمارشي نوار

أوقفت عناصر الأمن لحدود الساعة 118 شخص بشبهة تورطهم فـالمضاربة الغير قانونية فتيكيات ديال ماتشات كأس إفريقيا للأمم، اللي دايرة حاليا فعدد من المدن المغربية، حسب ما علنات عليه السلطات الأمنية.

وحسب معطيات رسمية، هاد التدخلات جاو فـالمرحلة الأولى ديال دور المجموعات، و كتتعلق ببيع تيكيات بثمن طالع بزاف على الثمن الحقيقي ديالها، وزيد عليهم قضايا ديال التزوير واستعمالو، النصب، والمس بالأنظمة الإلكترونية لمعالجة المعطيات.

ووضحّات نفس المعطيات باللي نظام اليقظة المعلوماتية ديال البوليس رصد عشرات الإعلانات المشكوك فيها فوسائل التواصل الاجتماعي، وهاد الشي لي عاون فعملية تحديد هوية المشتبه فيهم ويتشدّو فمدن مختلفة، خصوصاً المدن اللي كتحتاضن ماتشات البطولة الإفريقية.

وتم تقديم عدد من الموقوفين قدّام النيابات العامة المختصة، شي منهم فـحالة اعتقال وشي فـحالة سراح، على حسب طبيعة الأفعال والمنسوب ليهم ومستوى التورط ديالهم.

وأكدات السلطات الأمنية باللي عمليات المراقبة والتتبع غتبقى متواصلة، بتنسيق مع السلطات المحلية، باش يتمنعو أي محاولات لاستغلال هاد التظاهرة الرياضية فأنشطة مضاربة غير مشروعة.