المنتخب المغربي ربح نيجيريا بالبيلانتيات و تأهل لنهائي “الكان”

تأهل المنتخب المغربي لنهائي كأس إفريقيا للأمم المغرب 2025، بعدما ربح الماتش ديالو قدّام المنتخب النيجيري بضربات الترجيح (4-2)، فالمقابلة اللي تلعبات مساء الأربعاء الفايت فملعب الأمير مولاي عبد الله فالرباط، برسم نصف نهائي البطولة.

أسود الأطلس غادي يواجهو فالنهائي نهار 18 يناير الجاري منتخب السنغال، اللي ربح حتى هو منتخب مصر بهدف بلا رد فالماتش اللي تلعب فالملعب الكبير ديال طنجة.

وقدّام جمهور كبير وصل لـ65 ألف و458 متفرج، سالا الوقت الأصلي والإضافي بالتعادل السلبي 0-0، قبل ما يمشيو الفريقين لضربات الترجيح، اللي كانت فيها الكلمة الأخيرة للمنتخب المغربي بفضل التألق الكبير ديال الحارس ياسين بونو.

تشكيلة المنتخبين ما عرفاتش تغييرات كبيرة، باستثناء تغيير واحد دارو مدرب نيجيريا، ملي دخل أونييديكا بلاصة ويلفريد نديدي اللي كان موقوف بسبب جمع الإنذارات.

و مع صافرة البداية، بان أول تهديد مغربي فالدقيقة الثالثة، من بعد خطأ فوسط الميدان استغلو إسماعيل الصيباري، خطف الكرة ومشى بها حتى قريب للمرمى، ولكن التسديدة ديالو تصدات من الدفاع.

فالدقيقة التاسعة، توصل براهيم دياز بكورة ذكية من بلال الخنوس قدّام منطقة الجزاء، سدد باليسار ولكن الكرة دازت حدا القائم الأيسر ديال الحارس النيجيري.

أول رد حقيقي لنيجيريا جا فالدقيقة 14، بتسديدة قوية من أديمولا لوكمان، ولكن ياسين بونو كان فالموعد وتصدّى لها بنجاح.

الضغط المغربي تواصل، وركنية نفذها أشرف حكيمي فالدقيقة 29 خلات ارتباك فدفاع نيجيريا، ولكن أيوب الكعبي ما قدرش يستغلها، قبل ما يرجع حكيمي يهدد المرمى من ضربة ثابتة فالدقيقة 34، ولكن الكرة دازت حدّا القائم ولمسات غير الشباك الخارجية.

فالدقيقة 40، دار المنتخب المغربي هجمة منظمة بين الزلزولي والصيباري، ختمها هذا الأخير بتسديدة، غير أن الحارس ستانلي نوابالي كان واعي وخرّج الكرة.

الشوط الأول تميز بندّية كبيرة وقوة بدنية وتكتيكية بين المنتخبين، مع أفضلية نسبية للمغرب فالاستحواذ، اللي خلاتو يخلق فرص أكثر للتسجيل.

و مع بداية الشوط الثاني، حاول الفريقين يسيطرو على وسط الميدان، وأخطر فرصة جات فالدقيقة 52 بتسديدة لعبد الصمد الزلزولي من تمريرة ديال الصيباري، ولكن الحارس النيجيري خرجها لركنية.

نايل العيناوي لعب دور مهم فوسط الميدان، وساهم ففرض السيطرة المغربية، وما كانتش فرص واضحة حتى للدقيقة 68، باستثناء محاولة بين دياز والكعبي حبساتها يقظة الدفاع النيجيري.

فالدقيقة 79، سدد أشرف حكيمي كرة قوية من خارج المنطقة بعد تمريرة من نصير مزراوي، ولكن الدفاع النيجيري تصدّى لها.

الزلزولي حتى هو حاول يفك شفرة الدفاع النيجيري بتسديدة مقوسة خطيرة، ولكن الحارس ديفيس إباسي تدخّل وخرجها لركنية.

الناخب الوطني وليد الركراكي دار جوج تغييرات فالدقيقة 84، ودخل حمزة إيكمان وأسامة ترغالين بلاصة بلال الخنوس وأيوب الكعبي.

باقي دقائق الشوط الثاني ما جابو حتى جديد، وسالا الماتش بالتعادل، ومشاو الفريقين للأشواط الإضافية، اللي كانو فيها الأسود قريبين يسجلو فالشوط الإضافي الأول برأسية ديال نايف أكرد فالدقيقة 90+3 ولكن ضربات فالقائم.

الركراكي دخل يوسف النصيري بلاصة الزلزولي فالدقيقة 103، ومن بعد إلياس أخوماش بلاصة براهيم دياز فالدقيقة 107.

فالشوط الإضافي الثاني، نوّع المنتخب المغربي الهجمات ديالو خصوصاً من الأجنحة، وشكّل خطر على دفاع نيجيريا، قبل ما يسدد نايل العيناوي كرة قوية من بعيد تصدّى لها الحارس.

فالدقيقة 118، دار الركراكي آخر تبديل ودخل إلياس بن الصغير بلاصة إسماعيل الصيباري.

و احتكمو الطرفين لضربات الترجيح لي ابتاسمات للمنتخب المغربي بـ (4-2).

الماتش النهائي ديال كأس إفريقيا غادي يجمع بين المنتخب المغربي والسنغالي نهار الأحد الجاي فملعب الأمير مولاي عبد الله فالرباط مع الثامنة ديال الليل، بينما ماتش الترتيب بين نيجيريا ومصر غادي يتلعب نهار السبت مع الخمسة ديال العشية.