جواد بدة محروم من التعليق على مباراة المنتخب المغربي فنصف نهائي “الكان”

قررات أن شبكة “بي إن سبورتس” توقف المعلّق المغربي جواد بدة من التعليق على مباريات المنتخب المغربي فمنافسات كأس أمم إفريقيا 2025 اللي دايرة دابا فبلادنا.

هاد القرار جا من بعد الماتش اللي جمع المنتخب المغربي بالكاميرون، واللي سالا بفوز أسود الأطلس (2-0) نهار الجمعة اللي فات، ضمن ربع نهائي البطولة الإفريقية.

المعلق المغربي و أثناء التعليق ديالو على الماتش، ذكر اسم اللاعب الكاميروني المعتزل دوليًا كارل توكو إيكامبي، وسمّاه بـ“الأسطورة” الشي لي ما عجبش إدارة القناة القطرية.

الممثل المغربي طارق البخاري قال باللي “بي إن سبورتس” ما اعتبرتش اللي وقع خطأ مهني كبير، ولكن الإشارة لإيكامبي كانت هي السبب المباشر فإبعاد جواد بدة على التعليق على مباراة أسود الأطلس فالدومي فينال.

و ارتبط اسم إيكامبي بالهدف القاتل اللي سجلو فوق أرض الجزائر (2-1)، واللي عطى فداك الوقت بطاقة التأهل للكاميرون إلى مونديال قطر 2022، رغم أن الجزائر كانت رابحة فالذهاب (1-0).