نيجيريا ربحات الموزمبيق بسهولة و تأهلات لربع نهائي “الكان”
تفوق المنتخب النيجيري على منتخب موزمبيق برباعية نظيفة (4–0)، فالمباراة اللي تلعبات مساء الاثنين 5 يناير 2026 فملعب مدينة فاس، ضمن دور الـ16 من كأس أمم إفريقيا 2025، وبهذا الفوز ضمن النسور الخضر التأهل لربع النهائي.
الماتش بدا بإيقاع سريع من الجانبين، ولكن نيجيريا كانت الأخطر من البداية. ففي الدقيقة 20، قدر أديمولا لوكمان يهز الشباك من تمريرة حاسمة ديال أكور أدامز، معلناً تقدم المنتخب النيجيري.
وما وقفاتش نيجيريا عند هاد الهدف، وبقات ضاغطة على دفاع موزمبيق، حتى جا الدور على نجم غلطة سراي التركي وهداف الفريق فيكتور أوسيمين، اللي سجل الهدف الثاني فالدقيقة 24، مرة أخرى بصناعة من أدامز، ووسع الفارق.
لوكمان وأوسيمين واصلوا الضغط وسيطروا على مجريات اللعب، مع هجمات سريعة أربكت دفاع موزمبيق، اللي حاول يرد الفعل ولكن بلا نتيجة.
مع بداية الشوط الثاني، بقات نيجيريا محافظة على نفس الإيقاع الهجومي، وقدر أوسيمين يوقع الهدف الثالث فالدقيقة 47، مؤكداً مكانتو كواحد من أبرز نجوم المنتخب النيجيري وهدافو التاريخي.
وما شبعوش النسور الخضر من الأهداف، حيث واصلوا الضغط على حارس موزمبيق إرنان سيلواني، ونجح أكور أدامز فإضافة الهدف الرابع فالدقيقة 75.
وبهاد النتيجة، كتتبعث نيجيريا رسالة قوية للمنافس ديالها فربع النهائي، اللي غيتلعب نهار السبت 10 يناير 2026 فملعب مراكش واللي غا يواجه فيه الفائز من مباراة الجزائر والكونغو الديمقراطية، المقررة مساء الثلاثاء فملعب مولاي الحسن بالرباط.
